Pag-ibig, Isang Patimpalak?

Ang aking pangarap

Pag-ibig mong mailap

Pinilit na mahagilap

At ikaw ay nahanap

Ngunit ako'y napatulala

Sitwasyon ko'y malala

Sapagkat aking naalala

Sayo pala'y maraming nakapila

Kumukuha ng iyong atensyon

Sumusugal ng emosyon

Nagbibigay ng panahon

Na tila ito'y kompetisyon

Sa dami ng sumusuyo

Ako ba'y dapat ng lumayo?

Mistula bang malayo

Ang pag-asang maging tayo?

Sa aking mga kalaban

Sa hugis ng pangangatawan

At sa kanilang kagandahan

Ako'y walang kalaban-laban

Ako ba'y susuko?

Ano ba ang laban ko?

Akin lamang maipapangako

Pag-ibig na hindi mapapako

Hindi ka magrereklamo

Iyon sana ang makita mo

Iyan ang aking pagsamo

Pag-asang nais matamo

Tila kalaba'y humahalakhak

Sa kabiguan, ako'y nasasadlak

Tanong ko lamang, sa aking pag-iyak

Pag-ibig nga ba'y isang patimpalak?

Nakakalungkot isiping

Pag-asa ko'y katiting

Ngunit sa puso ko'y hinihiling

Sa dami ng sayo'y nahuhumaling

Na kahit sila ay unahin

Ako'y di mawawala sa'yong paningin

Dahil ako ang iyong pipiliin

Pipiliin na mahalin.

At 'pag ako ang napili

Hindi ka na masasaktang muli

Mamahalin kita sa bawat sandali

Dahil sa puso ko, ika'y walang katunggali